Tekjur Eurostar jukust um 6 prósent

Áhugi fólks á sögusviði kvikmyndarinnar Da Vinci lykillinn í París í Frakklandi og HM í knattspyrnu í Þýskalandi urðu til þess að tekjur Eurostar, lestarinnar sem gengur frá Lundúnum í Bretlandi undir Ermarsund og til Parísar í Frakklandi, námu tæpum 260 milljónum punda, eða 34,7 milljörðum íslenskra króna, á fyrstu sex mánuðum ársins. Þetta er 6 prósenta aukning á milli ára.

Stjórnendur rekstrarfélags lestarinnar segja að samstarf við aðstandendur kvikmyndarinnar sem stóðu að gerð myndarinnar eftir samnefndri skáldsögu Dan Browns hafi greinilega borgað sig.

Þá segja þeir að ferðir lestarinnar hafi verið á áætlun í rúmum 90 prósentum tilvika, sem sé betri árangur en nokkurt flugfélag geti státað af. Hafi það skipt miklu þegar fólk ákvað hvort það ætlaði að ferðast með lestinni eða flugvél á milli Bretlands og Frakklands.