Klárir í einkavæðingu

Bæði Föroya Banki og Föroya Sparikassi Group stefna að skráningu í Kauphöll Íslands og á Virðisbrævamarknað Færeyja. Janus Petersen, forstjóri Föroya Banki, segir að skráning bankans í Kauphöll Íslands geti líklega orðið á næsta ári.

Á dögunum samþykkti Landsþingið í Færeyjum lög um einkavæðingu Föroya Banki sem gefa stærsta hluthafanum, Figgjargrunninum frá 1992, sem á 99 prósenta hlutafjár, heimild til að selja hlutabréf til almennings. Janus segir að Figgjargrunnurin hafi hafist handa við undirbúning að sölunni og vinni nú að því að leita að ráðgjöfum.

"Eins og staðan er nú er ekki ljóst hversu hratt einkavæðingin gengur fyrir sér en menn munu ekkert tvínóna við hlutina. Stjórnmálamennirnir hafa lagt vogir sínar á lóðarskálarnar með því að samþykkja með yfirgnæfandi meirihluta frumvarp um einkavæðingu," segir Janus.

Markaðurinn greindi frá því snemma á þessu ári að Sparikassinn hefði ákveðið að stefna að skráningu árið 2007 en í síðustu viku tilkynnti stærsti hluthafinn, sjálfseignarstofnunin Sparikassagrunnurin, frá því að hann muni selja um tíu prósenta hlut á næstunni, sem lið í því að gera félagið skráningarhæft.