Íslendingar verða auðveld bráð

Lars Lagerback, þjálfari sænska liðsins, var ausinn lofi úr öllum áttum í Svíþjóð í gær og halda fjölmiðlar vart vatni yfir magnaðri spilamennsku liðsins gegn Spáni á laugardag. Liðið vann frækinn 2-0 sigur og er á toppi F-riðils undankeppni EM með fullt hús stiga eftir þrjá leiki. Fjölmiðlar eru vissir um að með sömu frammistöðu munu Íslendingar ekki eiga von á góðu á Laugardalsvellinum á þriðjudag.

Hver saknar Zlatan nú? spyr sænska blaðið Aftonbladet í fyrirsögn í gær og vísar í þá ákvörðun Zlatans Ibrahimovich, skærustu stjörnu Svía, að gefa ekki kost á sér eftir að hafa lent upp á kant við Lagerback fyrir leikinn gegn Lettum fyrir nokkrum vikum. Sænskir fjölmiðlar eru reyndar á einu máli um að öll umræðan í kringum þá uppákomu hafi í raun gert liðinu gott og þjappað landsliðshópnum enn frekar saman.

Sjónvarps- og útvarpslýsendur sænskra fjölmiðla voru stóryrtir í umfjöllun sinni eftir að leik lauk og var víða fullyrt að leikurinn væri einn sá besti sem sænskt landslið hefði spilað frá upphafi. El Classico er fyrirsögn sem birtist í nokkrum blaðanna í Svíþjóð og er þá verið að skírskota í spænska tungumálið. Enn fremur var Lettum og N-Írum beinlínis þakkað fyrir að taka stig af Íslendingum og Dönum, sem styrkir stöðu sænska liðsins á toppi riðilsins.

Fjölmiðlar á Spáni eru eins og gefur að skilja æfir út í Luis Aragones og lærisveina hans og segja þrjú stig eftir þrjá leiki vera algjörlega óásættanlegan árangur. Nokkrir miðlar fara fram á afsögn spænska þálfarans en Aragones, sem bauðst til þess að hætta með liðið eftir tapið gegn Norður-Írum í síðasta mánuði, er ekki á því að gefast upp. Framtíð mín liggur í höndum spænska knattspyrnusambandsins, var það eina sem Aragones vildi segja um framtíð sína. Hann bætti þó við að hann hefði áður lent í mótlæti en alltaf náð að vinna sig upp úr því.

Það eru þrír leikir búnir og nóg eftir. Við höfum tíma til að snúa við blaðinu. Þið þurfið bara að gefa okkar þann tíma, sagði Aragones og beindi orðum sínum til fjölmiðla á Spáni.

Fjölmiðlar í Norður-Írlandi segja frammistöðu síns liðs hafa verið magnaða gegn Dönum og telja það vera mikið afrek að hafa haldið hreinu gegn sóknarþenkjandi liði Danmerkur. Lokatölur á Parken urðu 0-0 og er danska liðið sagt hafa valdið vonbrigðum og vanmetið Norður-Íra.