Ósigurinn í París hjálpar okkur

Arsene Wenger, knattspyrnustjóri Arsenal, segir þá staðreynd að lið hans var aðeins 13 mínútum frá því að sigra Meistaradeild Evrópu á síðustu leiktíð, hjálpi liðinu nú til að ná enn betri árangri í keppninni. Viljinn til að ná árangri gegn líkunum hafi meðal annars fengið Thierry Henry til að vera áfram hjá félaginu.

Arsenal á að leika á heimavelli sínum, Emirates Stadium, gegn Porto á morgun.

"Ég vil vinna keppnina á hverju ári, næst því markmiði komumst við í fyrra. Það gefur okkur aukinn kraft nú til að klára dæmið," sagði Wenger.

"Menn hafa sagt að Arsenal sé gott í Englandi en ekki nógu gott í Evrópu. Nú vitum við að við getum leikið vel í Evrópu líka enda erum við teknir mjög alvarlega í keppninni," sagði knattspyrnustjórinn.