Á von á skemmtilegum leik á morgun

Jose Mourinho segist eiga von á skemmtilegum leik þegar hans menn í Chelsea taka á móti Barcelona í riðlakeppni Meistaradeildarinnar.

"Ég vona nú fyrst og fremst að bæði lið ljúki leik með 11 menn inni á vellinum," sagði Mourinho og vísaði til fyrri viðureigna liðanna sem oftar en ekki hafa endað í dramatík - rauðum spjöldum, rifrildum og umdeildum atvikum. "Þessi leikur verður öðruvísi en hinir leikirnir af því við erum að tala um leik í riðlakeppni þar sem minna er í húfi. Menn verða væntanlega rólegri og ég vonast til að sjá skemmtilega knattspyrnu," sagði Mourinho.