Hefðum átt að vinna stærra

Jose Mourinho var mjög sáttur við sigur sinna manna á Barcelona í Meistaradeildinni í kvöld og sagðist helst ósáttur við að ná ekki að gera út um leikinn fyrr með því að skora fleiri mörk. Hann segist nú hafa sett stefnuna á að halda toppsætinu í riðlinum.

"Þetta er frábær sigur og það var frábært að fá þrjú stig í dag, ekki bara stiganna vegna - heldur hvernig við fórum að því að ná í þau. Við hefðum átt að gera út um leikinn fyrr, því við fengum mörg marktækifæri til þess. Þessi úrslit gefa ekki rétta mynd af því hvernig leikurinn spilaðist, en nú ætlum við að reyna að halda toppsætinu," sagði Mourinho, en Chelsea er á toppnum með fullt hús - 9 stig - eftir þrjár umferðir - en Barcelona og Bremen eru með 4 stig.

Mourinho var síðan spurður hvort hann ætlaði að tileinka sigurinn markvörðum sínum sem báðir meiddust illa um helgina, en hann tileinkaði hann starfsmanni félagsins sem lést í umferðarslysi í gær. "Þessi sigur var ekki aðeins fyrir markverðina okkar, heldur er það sorglegra en það. Þessi sigur er fyrir Victoriu Buchanan, lést í gær. Hún var indæl stúlka og því viljum við tileinka henni og fjölskyldu hennar sigurinn í dag," sagði Mourinho.