Becks stakk af í brúðkaup Cruise

David Beckham er sagður vera kominn í ónáð hjá þjálfara sínum hjá Real Madrid, Fabio Capello, fyrir að mæta í brúðkaup kvikmyndaleikarans Tom Cruise.

Áætlað er að brúðkaup Cruise og Katie Holmes fari fram á ónafngreindum stað í nágrenni Róm á Ítalíu og er Beckham sagður hafa þegið boð kvikmyndastjörnunnar um að vera viðstaddur. Beckham flaug til Rómar með spúsu sinni Victoríu í gær við litla hrifningu Capello, en Beckham er meiddur á hné og hefði með réttu átt að vera í endurhæfingu í Madríd.

Myndir af Beckham-hjónunum náðust á flugvellinum í Róm í gær og á hann sér því litlar málsbætur. Talið er að óhlýðni Beckham verði jafnvel til þess að hann fái ekki nýjan samning hjá spænska stórveldinu en viðræður þess efnis hafa verið í gangi síðustu vikur.