Capello vill losna við Cassano

Vandræðagemlingurinn Antonio Cassano er að öllum líkindum á leið frá Real Madrid í janúar, að því er spænskir fjölmiðlar halda fram í gær. Hinn 24 ára gamli framherji er í algjörri ónáð hjá forráðamönnum félagsins sem vilja ólmir losna við hann.

“Fabio Capello (knattspyrnustjórinn) og Pedja Mijatovic (yfirmaður knattspyrnumála) hafa fengið nóg af skapsveiflum hans. Þeir vilja fá hann burtu,” er meðal þess sem segir í grein AS dagblaðsis á Spáni í gær.

Talið er að Roma og AC Milan hafi áhuga á að fá Cassano í sínar raðir, en leikmaðurinn yfirgaf einmitt Roma til að komast til Madríd. Þó er ljóst að Cassano fengi ekki að fara á neinu gjafaverði.