Aðdáendur Smith flykkjast á netið

Það er af sem áður var þegar aðdáendur stórstjarna fylktu liði að heimili nýlátinna stjarna til að votta samúð sína. Aðdáendur fyrirsætunnar og Playboy-kanínunnar Önnu Nicole Smith, sem lést í síðustu viku á sínu fertugasta aldursári, hafa hins vegar brugðist öðruvísi við, en þeir hafa í mun meiri mæli nýtt sér netið til hins ýtrasta, búið til vefdagbækur, blogg og aðrar vefsíður þar sem þeir tjá hug sinn til fyrirsætunnar, sem lést nú fyrir skömmu. Þá hefur fjöldi aðdáendasíðna um fyrirsætuna sprottið upp í netheimum.

En vefdagbækurnar eru ekki einu staðirnir þar sem aðdáendur Önnu tjá hug sinn því myndskrár af fyrirsætunni og brot úr sjónvarpsþáttaröð hennar, The Anne Nicole Show og finna má á netveitum á borð við YouTube, hafa notið gríðarlegra vinsælda eftir að hún hvarf yfir móðuna miklu. Sjónvarpþættirnir voru sýndir á bandarísku sjónvarpsstöðinni E! á árabilinu 2002 til 2004 en voru að þeim tíma loknum teknir af dagskrá vegna dræms áhorfs og fremur lélegra dóma.

Enn liggur ekkert fyrir um dánarorsök Önnu Nicole Smith og var greint frá því um síðustu helgi að jafnvel gætu liðið nokkrar vikur þar til niðurstaða fæst í málinu. Fyrir liggur hins vegar að engin eiturlyf hafi fundist í líkama hennar, sem geti útskýrt fráfall hennar, að sögn bandaríska fjölmiðla.