Ísraelar sagðir íhuga beitingu kjarnavopna

Ísraelar eru sagðir æfa árásir á kjarnorkuvinnslustöðvar Írana með atómsprengjum til að koma í veg fyrir að þeir geti haldið áfram auðgun úrans. Ísraelsk stjórnvöld neituðu í dag að slíkt væri í bígerð en Íranar segjast munu hefna slíkra árása grimmilega.

Þetta kemur fram í breska blaðinu Sunday Times í dag en heimildir sínar hefur blaðið frá hátt settum foringjum í ísraelska hernum. Þar er fullyrt að um nokkurt skeið hafi tvær ísraelskar flugsveitir æft aðflug að kjarnorkuvinnslustöðvum Írana með það fyrir augum að eyðileggja möguleika þeirra á að koma sér upp kjarnavopnum. Árásirnar munu beinast að þremur stöðvum sem gegna lykilhlutverki í kjarnorkuáætlun Írana. Ein þeirra, Natanz-verið, þar sem fram fer auðgun úrans, er langt undir yfirborði jarðar og því er talið að einungis sé hægt að eyða henni með litlum kjarnorkusprengjum. Þungavatnsverksmiðjan í Arak og kjarnorkuver í Isfahan verða hins vegar eyðilagðar með hefðbundnum sprengjum. Ísraelar hugsa með hryllingi til þeirrar stöðu sem upp er komin ef Íranar ná að búa til kjarnorkusprengju enda hefur Mahmoud Ahmadinejad, Íransforseti, ítrekað lýst því yfir að Ísrael verði að þurrka út af heimskortinu.

Stjórnmálaskýrendur eru ekki á einu máli hvers vegna Ísraelar geri þessi nú áform ljós. Á síðasta ári fullyrti bandaríski blaðamaðurinn Seymour Hearsh að embættismenn í Pentagon íhuguðu að varpa litlum kjarnorkusprengjum á íranskar vinnslustöðvar og vitað er að þeir hafa rætt við ísraelska embættismenn um aðgerðir. Vera má að Ísraelar séu með þessu að knýja Bandaríkjamenn til aðgerða eða að setja hræða stjórnvöld í Teheran. Hvert svo sem markmiðið er er ljóst að Ísraelar víla ekki árásir á borð við þessar fyrir sér því árið 1981 vörpuðu þeir sprengjum á Osirak-kjarnakljúfinn í Írak til að koma í veg fyrir kjarnorkuáætlun Saddams Hussein.