Iverson missir af stjörnuleiknum

Allen Iverson hjá Denver Nuggets varð í kvöld nýjasta nafnið á sjúkralistanum fyrir stjörnuleikinn í NBA deildinni sem fram fer í Las Vegas á sunnudaginn. Vesturstrandarliðið er því án leikstjórnanda í augnablikinu og því þykir víst að annað hvort Deron Williams frá Utah eða Chris Paul frá New Orleans taki stöðu Iverson í hópnum.

Iverson er fjórði leikmaðurinn sem þarf að draga sig úr Vesturliðinu á stuttum tíma. Yao Ming er frá vegna fótbrots og aldrei stóð til að hann spilaði leikinn. Steve Nash er meiddur á öxl og Carlos Boozer var með brákað bein í fæti.

Einhver forföll eru einnig í liði Austurstrandarinnar en þar herma nýjustu fréttir að Jason Kidd muni missa af leiknum vegna bakmeiðsla. Hann verður ekki með liði New Jersey sem tekur á móti San Antonio í nótt í beinni útsendingu á NBA TV klukkan 0:30.