Rijkaard: Það er gott að vera alvitur

Frank Rijkaard, þjálfari Barcelona, brást hinn versti við þegar hann heyrði að Rafa Benitez kollegi sinn hjá Liverpool væri þegar búinn að spá því hvaða leikmenn yrðu í byrjunarliði Barcelona í leik þeirra í 16-liða úrslitum Meistaradeildarinnar í kvöld.

"Það er aldeilis gaman að spila við lið sem hefur alvitran þjálfara," hreytti Rijkaard út úr sér á blaðamannafundi í dag. "Stundum eru það þeir sem þykjast vita allt sem í raun vita minnst. Þetta er ekki annað en leikur tveggja liða sem bæði hafa möguleika á að komast áfram. Það er ekki erfitt að lesa lið Liverpool. Þeir spila agað og fast og þegar maður hefur séð tvo leiki með þeim, veit maður upp á hár hvernig þeir spila. Ég gleymdi nú krystalkúlunni minni heima svo ég get ekki spáð fyrir um úrslitin - en við eigum góða möguleika á að bæta fyrir það sem aflögu fór í fyrri hálfleiknum," sagði Rijkaard.