Stórveldin slást í beinni á Sýn Extra

Evrópustórveldin AC Milan og Bayern Munchen mætast í kvöld í fyrri leik sínum í 8-liða úrslitum Meistaradeildarinnar og fer leikurinn fram á San Siro í Mílanó. Leikurinn verður sýndur beint á Sýn Extra og hefst útsending klukkan 18:30. Þetta eru tvö af sigursælustu liðum Evrópuknattspyrnunnar og hafa unnið titilinn tíu sínum samtals.

Bæði lið lyftu Evrópubikarnum á öldinni. Milan varð síðast Evrópumeistari árið 2003 og Bayern varð Evrópumeistari árið 2001 - en það var einmitt á Guiseppe Meazza leikvangnum í Mílanó.

Milan verður að teljast sigurstranglegra liðið í kvöld og hefur ítalska liðið aldrei tapað fyrir Bayern í Evrópukeppni. Þessi lið mættust í 16-liða úrslitum keppninnar í fyrra og þá hefði Milan 5-2 sigur samanlagt úr báðum leikjum. Ítalska liðið mætir til leiks með nánast frískan leikmannahóp þar sem þeir Alessandro Nesta og Paolo Maldini náðu báðir að komast óskaddaðir frá síðustu æfingum fyrir leik.

Þeir Serginho og Ricardo Olivera eru þó tæpir fyrir leikinn í kvöld vegna meiðsla og Georgíumaðurinn Kakha Kaladze getur ekki spilað vegna meiðsla. Ronaldo má ekki taka þátt í leiknum í kvöld því hann spilaði með Real Madrid á fyrri stigum keppninnar.

Hjá Bayern verður Owen Hargreaves klár í slaginn á ný eftir meiðsli, sem kostuðu að hann missti af toppslagnum við Schalke í þýsku deildinni um helgina. Mark van Bommel verður í leikbanni í kvöld og því er endurkoma Hargreaves afar mikilvæg fyrir miðjuspil þýska liðsins. Við hlið hans er reiknað með því að hinn ungi Andreas Ottl verði í byrjunarliðinu á kostnað Martin Demichalis. Þá verður Michael Rensing í markinu í stað Olvier Kahn, sem er í leikbanni.