Mourinho gefur lítið út á stemminguna á Anfield

Jose Mourinho vill ekki meina að stemmingin góða á Anfield í gær hafi orðið sínum mönnum í Chelsea að falli, en Rafa Benitez stjóri Liverpool sagði að áhorfendur liðsins væru "sá útvaldi" hjá Liverpool og skaut þar með á nafngiftina sem Mourinho gaf sjálfum sér þegar hann tók við Chelsea.

"Fólk talaði mikið um ótrúlega stemmingu á Anfield, en ég varð bara ekkert var við hana í gær. Ég sá vissulega gott andrúmsloft, en það sem ég tók helst eftir var bláklætt lið sem var að reyna að vinna leikinn. Ég sá þá bláu reyna að spila vel og vinna. Liverpool átti einn góðan leikkafla í fyrri hálfleik, en eftir það var það bláa liðið sem átti leikinn - svo ég veit ekki hvað stemmingin á vellinum hafði með það að gera," sagði Mourinho.