Hækkanir og lækkanir í Evrópu

Hlutabréfamarkaðir í Evrópu hafa tekið ágætlega við sér í kjölfar minni lækkana á Wall Street í gær en dagana á undan. Taugatitrings gætir hins vegar hjá asískum fjárfestum en Nikkei-vísitalan lækkaði um rúm 5,4 prósent við lokun markaða í Japan í morgun. Vísitalan hefur ekki lækkað jafn mikið á einum degi í sjö ár.

Vísitölur lækkuðu almennt í Asíu í dag þrátt fyrir að japanski seðlabankinn hafi dælt inn meira fé inn á fjármálamarkað þar í landi til að mýkja lendinguna fyrir fjármálastofnanir þar í landi. Japanskir fjárfestar hafa áhyggjur af því að útflutningur frá Asíu dragist saman vegna samdráttar í hagkerfi Bandaríkjanna. Þá eru vangaveltur uppi um að seðlabanki japans hækki stýrivexti þrátt fyrir ástand á markaði.

FTSE-vísitalan í Bretlandi hefur það sem af er dags hækkað um rúmt prósent og hin franska Cac-40 hefur hækkað um tæp 0,6 prósent. Þýska vísitalan Dax hefur hins vegar lækkað um 0,06 prósent það sem af er dags.

Hlutabréfavísitölur á Norðurlöndunum hafa að sömuleiðis bætt sig í kjölfar nokkurra lækkana síðustu daga en hlutabréfavísitalan í Ósló hefur hækkað um 1,3 prósent og í C20-vísitalan í Kaupmannahöfn um 1,14 prósent.