Minni vindhraði lækkar olíuverð

Heimsmarkaðsverð á hráolíu lækkaði nokkuð í verði í dag eftir að dró úr styrk fellibylsins Dean við Mexíkóflóa. Áður stefndi allt í að hann ógnaði olíuvinnslu við flóann sem hefði haft í för með sér að vinnslan myndi skerðast. Dean er nú flokkaður sem stormur og ekki talið að hann valdi miklum usla úr þessu.

Verð á hráolíu, sem afhent verður í næsta mánuði, lækkaði um 1,65 bandaríkjadali og stendur í 69,47 dölum á tunnu. Verðið hefur ekki verið lægra síðan undir lok júní í sumar, að sögn fréttastofunnar Associated Press.

Seint í gær stefndi allt í að fellibylurinn myndi koma með ógnarhraða inn á Mexíkóflóa og geta valdið tjóni á olíuvinnslustöðvum á svæðinu. Þúsundir starfsmanna olíufyrirtækja á svæðinu voru því fluttir á brott á meðan óveðrið gengi yfir og skrúfað fyrir frekari vinnslu í bili.

Eins og útlit er fyrir núna virðist starfsemin geta hafist á ný við Mexíkóflóa og er samdráttur á olíuframleiðslunni mun minni en horfur voru á.