Hugsanlega erfiðustu mótherjarnir

Sir Alex Ferguson fullyrðir að mótherjar Manchester United í 16-liða úrslitum Meistaradeildarinnar, franska liðið Lyon, sé einn erfiðasti mótherjinn sem lið hans hefði geta fengið í drættinum í dag.

Margfaldir frönsku meistararnir hafa náð að halda sér í hópi bestu liða Evrópu ár eftir ár þrátt fyrir að hafa ár hvert selt frá sér sína bestu menn - kappa á borð við Michael Essien, Eric Abidal og Mahamadou Diarra.

"Þetta gæti verið erfiðasti andstæðingurinn af þeim fimm sem við gátum mætt í næstu umferð," sagði Sir Alex í dag.

"Lyon er sjöfaldur meistari í Frakklandi sem er ótrúlegt á miðað við alla þá leikmenn sem liðið hefur misst á síðstu árum. Þetta verður sannarlega ekki auðveldur leikur og við þurfum á öllum okkar bestu mönnum að halda þegar kemur að þessum leikjum. Ég vona að svo verði, því ég met möguleika okkar góða ef við náum að tefla fram okkar besta liði," sagði Ferguson.