Vona að hann ráðist ekki á áhorfanda

Kínverski miðherjinn Yao Ming hefur komið af stað nokkrum titringi í herbúðum Houston Rockets í NBA deildinni vegna ummæla sem hann lét hafa eftir sér um nýjasta liðsfélaga sinn Ron Artest í samtali við Houston Chronicle í gær.

Blaðið hafði samband við kínverska risann og spurði hann hvernig honum litist á nýjasta liðsmann Rockets, hinn villta varnarmann Ron Artest.

"Ég vona að hann sé hættur að slást og berja áhorfendur uppi í stúku," var haft eftir Yao Ming í Houston-blaðinu.

Ron Artest á sér nokkuð svarta sögu í NBA deildinni vegna agavandamála og er án efa frægastur fyrir að verða kveikjan að ljótasta uppþoti í sögu deildarinnar árið 2004 þegar hann réðist á áhorfanda uppi í stúku í Detroit.

Artest var fljótur að svara fyrir sig þegar hann heyrði af ummælum Kínverjans stóra.

"Ég skil hvað Yao var að meina, en ég kem úr "gettóinu" og það mun ekki breytast. Ég mun ekki breyta því hver ég er. Yao hefur spilað með mörgum svörtum leikmönnum, en hann hefur aldrei spilað með manni sem er jafn sterkur útsendari síns menningarheims. Yao mun komast að þessu þegar við kynnumst," sagði Artest, sem vill enn meina að hann sé misskilinn eftir uppþotið í Detroit.

"Uppákoman í Detroit er menningartengd. Þarna var maður sem sýndi mér vanvirðingu og fólk verður að átta sig á því hvaðan ég er að koma. Fólk sem þekkir mig veit að Ron Artest breytist aldrei," sagði Artest.

Þegar ljóst varð að hann færi til Houston, lýsti hann skiptunum sem blessun og sagði að sér liði eins og krakka í sælgætisverslun.

Nú virðist komið eitthvað hik á kappann ef marka má ummæli hans í samtali við Sacramento Bee.

"Ég á enn eftir að sjá hvort forráðamönnum Houston er alvara með að fá mig eða hvort þetta eru bara hver önnur leikmannaksipti. Ég á eftir að tala við þá. Ef Yao vill hafa mig, reikna ég með því að þetta verði í fínu lagi. Hann hefði kannski átt að hringja í mig áður en hann lét þessi orð falla, en þetta er liðið hans og liðið hans Tracy McGrady," sagði hinn yfirlýsingaglaði Artest.