Eiður Smári í hópi Barcelona

Eiður Smári Guðjohnsen er í leikmannahópi Barcelona sem mætir Glasgow Celtic í síðari viðureign liðanna í 16-liða úrslitum Meistaradeildar Evrópu í kvöld.

Yaya Toure og Bojan Krkic eru í hópnum á nýjan leik en þeir voru ekki með þegar Barcelona tapaði 4-2 fyrir Atletico Madrid í spænsku deildinni um helgina.

Bojan hefur átt við meiðsli að stríða en hefur nú fengið grænt ljós frá lækni Börsunga. Ef hann skorar í leiknum í kvöld gæti hann orðið yngsti markaskorari Meistaradeildarinnar frá stofnun hennar.

Edmilson og Giovani eru ekki í leikmannahópnum né heldur Rafa Marquez sem á við meiðsli að stríða.

Hópurinn: Valdés, Pinto, Henry, Xavi, Iniesta, Puyol, Sylvinho, Bojan, Eto'o, Milito, Messi, Ronaldinho, Deco, Abidal, Thuram, Zambrotta, Eiður Smári og Touré.