Fjórða árið í röð sem meistararnir detta út í 16-liða úrslitum

Evrópumeistarar AC Milan urðu að játa sig sigraða gegn Arsenal á heimavelli í gær en þetta var fjórða árið í röð sem ríkjandi Evrópumeistarar falla úr leik í 16-liða úrslitum deildarinnar.

Barcelona, Liverpool og Porto féllu einnig úr leik í 16-liða úrslitunum á sínum tíma en þar áður höfðu ríkjandi meistarar aldrei dottið úr leik svo snemma í keppninni.

Síðan að nafni keppninnar var breytt úr Evrópukeppni Meistaraliða í Meistaradeild Evrópu hefur engu liði tekist að verja Evrópumeistaratitilinn. Marseille varð meistari fyrsta árið eftir að nýja nafnið var tekið upp og er eina liðið sem fékk ekki tækifæri til að verja titilinn ári síðar.

Ríkjandi Evrópumeistarar hafa ekki komist í sjálfan úrslitaleikinn síðan að Juventus gerði það vorið 1997 og töpuðu óvænt fyrir Borussia Dortmund.

Dortmund er annað tveggja liða sem datt úr leik í undanúrslitum sem Evrópumeistari. Real Madrid hefur tvívegis dottið úr leik í undanúrslitum, árin 2001 og 2003.

Fjögur lið hafa dottið úr leik í fjórðungsúrslitum sem Evrópumeistarar. Þau eru Real Madrid (1999), Manchester United (2000), Bayern München (2002) og AC Milan (2004).

Af þeim tólf liðum sem eru enn með í keppninni í ár hafa fimm orðið Evrópumeistarar eftir að nafni keppninnar var breytt. Inter varð Evrópumeistari árin 1964 og 1965 en hin liðin sex hafa aldrei orðið Evrópumeistarar.

Af þeim sex liðum eru tvö komin áfram í fjórðungsúrslitin - Arsenal og Fenerbahce. Hin fjögur - Chelsea, Olympiakos, Schalke og Roma eru öll að keppa í kvöld um að halda í vonina um sinn fyrsta Evrópumeistaratitil.