Wade spilar ekki meira á leiktíðinni

Skotbakvörðurinn Dwyane Wade hjá Miami Heat kemur ekki meira við sögu hjá liðinu á tímabilinu. Hann hefur átt við margvísleg meiðsli að stríða undanfarin tvö ár, en hnémeiðsli gera það að verkum að hann missir af síðustu 20 leikjum liðsins í vetur.

Wade er einn besti leikmaður NBA deildarinnar og var kjörinn verðmætasti leikmaður lokaúrslitanna árið 2006 þegar Miami vann fyrsta meistaratitilinn í sögu félagsins.

Miami hefur gengið afleitlega í vetur og þar á bæ liggur ekkert annað fyrir en að byrja frá grunni og byggja upp nýtt lið.

Pat Riley, forseti og þjálfari liðsins, hefur þannig íhugað að fara af hliðarlínunni og einbeita sér að því að skoða háskólaleikmenn fram á sumarið.