Kuyt: Þetta var ekki vítaspyrna

Hollendingurinn Dirk Kuyt vill ekki meina að hann hafi brotið á Alex Hleb í síðari hálfleik viðureignar Arsenal og Liverpool í Meistaradeildinni í kvöld. Mörgum þótti Arsenal hafa átt að fá víti þegar Kuyt virtist toga Hleb niður í teignum.

"Ég togaði ekki í treyjuna hans. Þetta var aldrei víti - en það munaði litlu," sagði Kuyt í samtali við Sky. "Við gerðum allt sem við gátum í þessum leik. Við vildum skora og gerðum það og vorum vel inni í leiknum eftir markið. Við höfum sýnt það að Evrópukvöldin á Anfield eru mögnuð og við vonum að ef við náum viðlíka leik á móti þeim ár - muni það tryggja okkur í undanúrslitin," sagði Kuyt.