Mickelson vann á Doral

Phil Mickelson bar sigur úr býtum á WGC-CA-mótinu á Doral-vellinum í gær. Hann lenti í æsispennandi keppni við Nick Watney sem kom í hús höggi á eftir Mickelson.

Watney var aðeins nokkrum millimetrum frá því að knýja fram bráðabana er pútt hans stöðvaðist við holuna á síðustu flötinni.

„Ég reyndi að setja réttan hraða á púttið en því miður vantaði örlítið upp á," sagði Watney svekktur.

Sigurinn var Mickelson kær, sérstaklega þar sem hann þurfti að fara á spítala kvöldið fyrir lokahringinn þar sem hitinn í Flórída var að bera hann ofurliði.

„Ég barðist grimmilega allan daginn fyrir þessu. Ég náði ekki að fylgjast með öllum frábæru höggunum hjá Nick því ég var að hugsa um að halda orkunni uppi hjá mér. Ég hef ekki borðað mikið síðustu þrjá daga og þetta var erfitt. Það var því mjög ljúft að ná að klára þetta," sagði Mickelson.