Boðið upp á tvíhöfða í Framhúsinu í dag

Tveir handboltaleikir fara fram í Framhúsinu í Safamýri í dag þar sem Fram mætir Stjörnunni í N1-deild kvenna og Fram tekur á móti Gróttu í N1-deild karla.

Kvennaleikurinn hefst kl. 14 en búast má við hörkuleik þar sem liðunum var spáð efstu tveimur sætunum í árlegri spá formanna, þjálfara og fyrirliða liðanna í deildinni.

Með leik Fram og Gróttu klárast fyrsta umferð N1-deildar karla en leikurinn hefst kl. 16. Lið Fram er mikið breytt frá síðasta tímabili og því verður fróðlegt að sjá hvernig því gengur gegn nýliðum Gróttu.