Vidic og Ferdinand ekki með United á morgun

Alex Ferguson, stjóri Manchester United, hefur ákveðið að hvíla þá Nemanja Vidic og Rio Ferdinand í leiknum gegn Rangers í Meistaradeildinni á morgun.

Báðir æfðu með liðinu í dag en United á erfiðan leik gegn Blackburn í ensku úrvalsdeildinni um helgina. Svo mætir liðið West Ham á þriðjudaginn í fjórðungsúrslitum ensku deildabikarkeppninnar.

Líklegt er að þeir Jonny Evans og Chris Smalling muni standa vaktina í vörn United á morgun.

Darren Fletcher verður ekki heldur með í förinni til Skotlands en hann æfði ekki í dag, né heldur Darron Gibson, Gary Neville, Michael Owen og Owen Hargreaves.