Óvæntir sigrar hjá Selfossi og HK

Selfoss og HK unnu góða sigra í leikjum sínum í N1-deild karla í kvöld. Selfoss lagði Val, 32-30, og HK vann Fram, 33-29.

HK tapaði stórt fyrir Akureyri í fyrstu umferð deildarinnar og Selfoss tapaði þá fyrir Fram.

En liðin sýndu í kvöld að þau eru ekki af baki dottin og náðu í sín fyrstu stig í deildinni í vetur.

Valur hafði sex marka forystu í hálfleik gegn Selfossi í kvöld, 18-12, en nýliðarnir sneru leiknum sér í vil í síðari hálfleik og unnu sem fyrr segir tveggja marka sigur.

Sigur HK var öruggur en liðið var með fimm marka forystu í hálfleik, 15-10.