Brawn: Sjáum réttan Schumacher 2011

Ross Brawn, yfirmaður Mercedes liðsins segir að Michael Shcumacher verði meðal keppenda í Formúlu 1 árið 2011, þrátt fyrir mikla fjölmiðlaumræðu um slakan árangur hans á þessu ári.

Schumacher byrjaði að keppa aftur, eftir þriggja ára hlé, en árangur hans og Mercedes liðsins hefur valdið mörgum vonbrigðum.

"Michael er vitanlega svekktur, en hann nýtur verkefnisins. Hann mætir ekki til keppni og óskar þess að hann væri annars staðar. Hann vill finna lausn á vandanum og nýtur kappakstursins", sagði Brawn á f1.com.

"Auðvitað vill hann gera betur, en ég get alvega sagt ykkur það að Michael er metnaðarfullur og sjöfaldur meistari. Það er ljóst að Schumacher mun ekki hætta að keppa, af því það gengur miður vel."

"Aksturstækni Michaels er þannig að hann treystir á framdekkin, að þau geti tekið á móti því hvernig hann bremsar og beitir bílnum og það hefur ekki gengið upp með dekkjum þessa árs. Við væntum þess að það gangi betur á Pirelli dekkjum næsta árs. Það byrja allir ökumenn á sömu dekkjum og þá mun Michael standa jafnfætis öðrum, sem þekkja dekkin sem notuð eru núna."

Brawn segir lítinn mun á Schumacher og Nico Rosberg, en þeim síðarnefnda hefur gengið betur í mótum ársins. Brawn segir Mercedes sé þegar farið að huga að bíl næsta árs og liðið hefur gefið upp á bátinn að ná sigri í ár.

"Ég spái því að við sjáum hinn rétta Schumacher árið 2011, þegar við höfum smíðað betri bíl fyrir hann", sagði Brawn.