Anelka aldrei spilað betur

Carlo Ancelotti, stjóri Chelsea, segir að Nicolas Anelka hafi aldrei spilað betur á ferlinum en einmitt nú. Hann átti ríkan þátt í 4-1 sigri Chelsea á Spartak Moskvu í Meistaradeild Evrópu í gær.

Chelsea tryggði sér í gær sæti í 16-liða úrslitum Meistaradeildarinnar en Anelka skoraði eitt mark í leiknum.

„Mark Anelka kom á hárréttu augnabliki og galopnaði leikinn fyrir okkur. Þetta var frábært mark hjá honum," sagði Ancelotti. „Ég held að hann hafi aldrei verið betri á sínum ferli."

Chelsea er með fullt hús stiga eftir fjóra leiki í A-riðli en Anelka hefur alls skorað sex mörk í fimm leikjum Chelsea í keppninni til þessa.

„Anelka er reynslumikill. Hann er líka afar hæfileikaríkur og býr yfir góðum hraða," sagði Ancelotti."