NBA í nótt: Dallas á skriði - vann Miami

Dallas Mavericks er á miklu skriði þessa dagana en í nótt vann liðið góðan sigur á lánlausu liði Miami Heat, 106-95.

Í gærnótt stöðvaði Dallas sigurgöngu San Antonio sem hafði unnið tólf leiki í röð og í nótt vann liðið sinn fimmta sigur í röð er LeBron James og félagar í Miami komu í heimsókn.

Það er reyndar ekkert nýtt að Dallas vinni Miami og í fjórða sinn í síðustu fimm leikjum liðanna sem það gerist. Dallas hefur ekki tapað fyrir Miami í deildakeppninni í sex og hálft ár.

Það breyttist þó mikið hjá Miami í sumar þegar þeir James og Chris Bosh komu til liðsins og áttu margir von á miklu frá þeim.

Þetta var fjórða tap Miami í síðustu fimm leikjum liðsins og ákváðu leikmenn að funda sérstaklega eftir leikinn í gær.

Jafnræði var með liðunum í fyrri hálfleik en Dallas náði að síga fram úr í þriðja leikhluta. Miami reyndi að koma sér aftur inn í leikinn í fjórða leikhluta en náði mest að minnka muninn í fimm stig.

Caron Butler skoraði 23 stig fyrir Dallas og Dirk Nowitzky var með 22 stig. Alls skoruðu sex leikmenn Dallas minnst tíu stig í leiknum, þar af þrír varamenn.

Að sama skapi fékk þríeykið hjá Miami afskaplega litla hjálp. James var með 23 stig og þeir Bosh og Wade 22 stig hvor. Allir aðrir leikmenn Miami skoruðu 28 stig til samans.

Dallas er í fínum málum og hefur unnið tólf af sextán leikjum sínum í haust en Miami er í bullandi vandræðum með níu sigurleiki í alls sautján leikjum.

Atlanta vann New York, 99-90. Jamal Crawford skoraði 21 stig fyrir Atlanta og Al Horford var með sautján stig og níu fráköst.

Orlando vann Washington, 100-99. Dwight Howard skoraði 32 stig, þar á meðal sigurkörfuna þegar 4,3 sekúndur voru eftir.

Milwaukee vann Charlotte, 104-101. Brandon Jennings skoraði 32 stig og setti niður tvö mikilvæg vítaskot þegar 5,7 sekúndur voru eftir.

Golden State vann Minnesota, 104-94. Dorell Wright skoraði 30 stig og setti nýtt félagsmet með því að setja niður níu þrista í leiknum.

Cleveland vann Memphis, 92-86. Mo Williams skoraði 25 stig og JJ Hendricks sextán fyrr Cleveland.

Philadelphia vann New Jersey, 102-86. Jrue Holiday var með 20 stig og þrettán stoðsendingar fyrir Philadelphia.

Chicago vann Sacramento, 96-85. Derrick Rose var með 30 stig, sjö stoðsendingar og sjö fráköst fyrir Chicago.