Björgvin Þór: Rúlluðum yfir þá á síðustu tíu mínútunum

„Þetta er alveg ágætt bara. Þetta var allt í járnum bara þangað til tíu mínútur voru eftir, þá rúlluðum við bara yfir þá. Vörnin var frábær hjá okkur og markvarslan náttúrulega bara í ruglinu.

Birkir fór á kostum," sagði Haukamaðurinn Björgvin Þór Hólmgeirsson í leikslok eftir 23-15 sigur Hauka gegn Val í úrslitaleik Eimskipsbikarsins.

Björgvin Þór skoraði fimm mörk fyrir Hauka og steig upp á mikilvægum augnablikum í leiknum.

„Kerfin gengu bara út á það og það hefðu bara aðrir gert það nákvæmlega sama ef þeir hefðu verið í sömu stöðu og ég.

Þetta var annars mjög fínt og við lögðum náttúrulega mikla áherslu á bikarkeppnina og það er því gríðarlega sætt að uppskera á þennan hátt. Það verður örugglega gaman í kvöld," sagði Björgvin Þór ánægður í leikslok í dag.