Bale gæti náð síðari leiknum gegn Milan

Líkur eru á því að Gareth Bale, leikmaður Tottenham, verði orðinn leikfær fyrir síðari leik liðsins gegn AC Milan í 16-liða úrslitum Meistaradeildar Evrópu.

Bale missti af fyrri leiknum vegna bakmeiðsla en Tottenham vann engu að síður góðan útisigur, 1-0.

Harry Redknapp, stjóri Tottenham, er vongóður á að Bale verði með í leiknum.

„Ég hlakka mikið til leiksins,“ sagði hann en viðureignin fer fram á White Hart Lane eftir tæpar þrjár vikur.

„Vonandi verður Bale kominn til baka en bæði hann og Lennon búa yfir miklum hraða.“

Hann reiknar þó með því að AC Milan muni gefa allt í leikinn. „Ég á von á því en við áttum frábæran leik síðast.“

Gennaro Gattuso, fyrirliði Milan, verður í banni í leiknum vegna gulra spjalda. Þar að auki er búist við því að hann verði dæmdur í langt keppnisbann fyrir að skalla Joe Jordan, aðstoðarstjóra Tottenham, eftir leikinn.