Van Gaal leiðist leikstíll Inter

Liðin sem mættust í úrslitum Meistaradeildarinnar á síðustu leiktíð, Inter og FC Bayern, mætast í sextán liða úrslitum keppninnar í kvöld.

Louis Van Gaal, þjálfari Bayern, er ekki beint hrifinn af leikstíl Inter sem hann segir vera þreytandi.

"Ég sé ekki mikinn mun á Inter-liðinu nú og í fyrra. Það er nóg að kíkja á liðið af og til því ekkert hefur breyst. Jafnvel gegn Cagliari gerði liðið ekkert af því að sækja," sagði Van Gaal.

"Mörg lið vilja spila varnarsinnaðan bolta en ég vil bjóða stuðningsmönnum okkar liðs upp á eitthvað annað og meira. Ég vil að við skemmtum og spilum sóknarbolta. Það er augljóslega mun erfiðara en að hugsa bara um varnarleik en svona er mín heimspeki i boltanum."