Vettel hóf titilvörnina með sigri

Sebastian Vettel hjá Red Bull vann fyrsta Formúlu 1 mót ársins á götum Melbourne í Ástralíu í dag. Hann hafði nokkra yfirburði í mótinu, eftir að hafa náð langbesta tíma í tímatökum.

Lewis Hamilton varð í öðru sæti á McLaren og Vitaly Petrov á Renault í þriðja sæti, en hann er fyrsti rússneski Formúlu 1 ökumaðurinn í sögunni. Náði sínum besta árangri í íþróttinni, en hann keppti í fyrra.

Í upphafi mótsins var mínútuþögn til að minnast fórnarlamba náttúruhamfaranna í Japan á dögunum og allir bílar voru merktir japanska fánanum og margir ökumenn með sérstakar merkingar á hjálmum sínum. Einn ökumaður er japanskur, en það er Kamui Kobayashi og ók hann með sorgarband.

Vettel var fremstur á ráslínu og náði strax forystu í mótinu og hélt Hamilton í skefjum frá upphafi til enda. Fernando Alonso á Ferrari átti aldrei möguleika á að skáka Petrov á Renault  á lokaspretti mótsins og liðsmenn Renault sendu hlýjar kveðjur í sjónvarpsútsendingunni til Robert Kubica sem hvílir heima vegna meiðsla sem hann hlaut í rallkeppni. Nick Heidfeld ekur bíl Renault í stað Kubica en náði ekki markverðum árangri.

Heimamaðurinn Mark Webber náði ekki að setja mark sitt á baráttuna um verðlaunasæti, en nýliðinn Sergio Perez frá Mexíkó á Sauber náði sjöunda sæti í fyrsta móti ársins á undan liðsfélaga sínum Kobayashi.

Lokastaðan

1.  Vettel        Red Bull-Renault           1h29:30.259

 2.  Hamilton      McLaren-Mercedes           +    22.297

 3.  Petrov        Renault                    +    30.560

 4.  Alonso        Ferrari                    +    31.772

 5.  Webber        Red Bull-Renault           +    38.171

 6.  Button        McLaren-Mercedes           +    54.300

 7.  Perez         Sauber-Ferrari             +  1:05.800

 8.  Kobayashi     Sauber-Ferrari             +  1:16.800

 9.  Massa         Ferrari                    +  1:25.100

10.  Buemi         Toro Rosso-Ferrari         +     1 hringur

Bílasmiðir

        

 1.  Vettel        25        1.  Red Bull-Renault           35

 2.  Hamilton      18        2.  McLaren-Mercedes           26

 3.  Petrov        15        3.  Renault                    15

 4.  Alonso        12        4.  Ferrari                    14

 5.  Webber        10        5.  Sauber-Ferrari             10

 6.  Button         8        6.  Toro Rosso-Ferrari          1

 7.  Perez          6