Helgi Valur kallaður til Kýpur

Helgi Valur Daníelsson er farinn til Kýpur til að taka þátt í landsleik Íslendinga og Kýpurmanna í undankeppni EM sem fer fram á laugardaginn.

Ólafur Jóhannesson, landsliðsþjálfari, valdi Helga Val Daníelsson inn í hópinn í stað Ragnars Sigurðssonar sem á við veikindi að stríða.

Ólafur hafði áður kallað á Arnór Svein Aðalsteinsson til að fylla í skarð Grétars Rafns Steinssonar sem á við meiðsli að stríða.

Helgi Valur Daníelsson lék tvo landsleiki á síðasta ári og hefur alls leikið 16 leiki fyrir A-landsliðið. Hann lék allan leikinn þegar Ísland tapaði 1-3 á móti Portúgal á Laugardalsvellinum. Helgi var einnig í byrjunarliðinu í markalausu jafntefli á móti Kýpur fyrir rúmu ári síðan.