Ronaldo: Dómarinn var til skammar

Cristiano Ronaldo, leikmaður Real Madrid, var allt annað en sáttur við norska dómarann Oddvar Moen í kvöld en hann dæmdi leik Real og Dinamo Zagreb.

Varnarmenn Zagreb spörkuðu Ronaldo linnulítið niður og Ronaldo fannst hann ekki fá neina vernd hjá dómaranum. Ronaldo yfirgaf völlinn með blóðugan ökkla sem þurfti að sauma inn í klefa.

"Dómarinn var til skammar. Ég vona að hann dæmi aldrei aftur hjá okkur því hann er skammarlegur," sagði Ronaldo.

Real vann leikinn, 0-1.