Cech: Ekkert óeðlilegt við það að vilja vinna Meistaradeildina

Markvörðurinn Petr Cech hefur viðurkennt að leikmenn Chelsea þrái að vinna Meistaradeildina en óttast ekki að leikmenn liðsins skaði sig takist það ekki. Chelsea leikur væntanlega sinn erfiðasta leik í riðlakeppninni á morgun er liðið mætir Valencia á Spáni.

Chelsea hefur verið ótrúlega nálægt því að vinna Meistaradeildina á síðustu árum og margir halda því fram að það sé orðið að þráhyggju hjá eigandanum, Roman Abramovich, að vinna keppnina.

"Öll lið þrá að vinna Meistaradeildina. Það er ekkert óeðlilegt. Það skiptir ekki máli hvort lið hafi unnið áður. Það vilja allir vinna þessa keppni," sagði Cech.

"Það er okkar markmið eins og annarra að vinna. Það er alltaf talað um þessa þráhyggju á neikvæðan hátt. Það kemur mér gríðarlega á óvart."