Markalaust jafntefli hjá Arsenal og Marseille

Arsenal hélt toppsætinu í F-riðli Meistaradeildarinnar en tókst ekki að tryggja sér sæti í sextán liða úrslitunum þegar liðið gerði markalaust jafntefli í kvöld á móti franska liðinu Marseille.

Arsenal er með eins stigs forskot á Marseille en þýska liðið Borussia Dortmund á enn möguleika eftir 1-0 heimasigur á Olympiacos.

Arsene Wenger byrjaði með Robin van Persie á bekknum og hollenski framherjinn fékk ekki að koma inn á fyrr en á 62. mínútu.

Leikurinn var mjög opinn til að byrja með en síðan hægðist á sóknarþunga liðanna. Arsenal ógnaði meira en Frakkarnir vörðust vel og fögnuðu mikilvægu stigi.

Þessi úrslit þýða að Arsenal og Marseille tókst hvorugu að skora í tveimur innbyrðisleikjum liðsins í riðlinum en þau eru engu að síður í tveimur efstu sætunum með góða möguleika á því að komast áfram í sextán liða úrslitin.