Sara Björk lagði upp sigumarkið - Malmö í átta liða úrslit Meistaradeildarinnar

Sara Björk Gunnarsdóttir og Þóra Björg Helgadóttir kórónuðu í kvöld frábært tímabil með sænska liðinu LdB FC Malmö þegar sænsku meistararnir komust áfram í átta liða úrslit Meistaradeildarinnar.

LdB FC Malmö vann 1-0 heimasigur á austurríska félaginu SV Neulengbach en sænska liðið vann 3-1 sigur í fyrri leiknum í Austurríki og því 4-1 samanlagt. Sara Björk skoraði tvö mörk í fyrri leiknum.

Þóra og Sara Björk spiluðu allan leikinn en hollenski landsliðsframherjinn Manon Melis skoraði eina mark leiksins á 23. mínútu eftir stoðsendingu frá Söru Björk.

Þýska liðið Turbine Potsdam komst einnig örugglega áfram eftir 7-0 sigur á skoska liðinu Glasgow City í seinni leik liðanna en Potsdam hafði unnið fyrri leikinn 10-0. Margrét Lára Viðarsdóttir mun spila með þýska liðinu eftir áramót.