Mancini býst við einkar erfiðum leik í kvöld

Man. City getur tryggt sér sæti í 16-liða úrslitum Meistaradeildar Evrópu í kvöld takist liðinu að leggja Napoli af velli. Roberto Mancini, stjóri City, býst þó við einstaklega erfiðum leik.

City má að sama skapi ekki misstíga sig gegn Napoli í kvöld því það gæti sett liðið í þá stöðu að verða að vinna FC Bayern í lokaumferð riðlakeppninnar.

"Liðið er í góðu formi og það eru allir leikir erfiðir. Við erum þess utan að spila á þriggja daga fresti og það tekur á. Þessi leikur verður ólíkur öllum öðrum leikjum í vetur því þetta er síðasta tækifæri Napoli og liðið mun því klárlega selja sig mjög dýrt. Þetta verður virkilega erfitt," sagði Mancini.

"Við megum ekki gefa eftir og þurfum að klára leikinn því við ætlum okkur áfram. Eftir það getur allt gerst því við erum með gott lið sem getur enn bætt sig."

Mancini á sterka tengingu við Napoli en móðir hans og eiginkona koma báðar frá borginni.