Hversu langt getur liðið sokkið?

 Ólafur Jóhannesson þurfti að horfa upp á eina verstu frammistöðu íslenska landsliðsins undir sinni stjórn í gærkvöldi þegar Ungverjar unnu 4-0 stórsigur á íslenska landsliðinu í vináttulandsleik í Búdapest. Var þetta kannski eins og gamla stórveldi Ungverja væri að vakna úr dvala? Nei, svo var nú ekki því lítið mótstaða og ítrekuð mistök íslensku leikmannanna sáu til þess að heimamenn litu út eins og ein af betri knattspyrnuþjóðum Evrópu.

„Þetta var alls ekki gott. Okkur var refsað grimmilega fyrir allt sem við gerðum illa. Ég er ekki viss um að segja að þetta hafi verið versti leikurinn undir minni stjórn en þetta var allavega versta tapið. Tölurnar eru stórar,“ sagði Ólafur eftir leikinn í gær.

Íslenska liðið mætir með auman rassinn inn í lokaleiki sína í undankeppninni og er víst til að falla enn neðar á hinum umtalaða FIFA-lista bætist enn fleiri töp við á síðustu vikum Ólafs Jóhannessonar í landsliðsþjálfarastöðunni.

„Það vantaði í okkar hóp hérna og þeir menn sem ég valdi fyrir þetta koma líklega allir inn aftur. Auðvitað verða einhverjar breytingar eins og alltaf eru á milli leikja.Það er slæmt að tapa og það fer á sálina á mönnum þegar hlutirnir ganga ekki upp. Það er bara staðreynd. Þetta lítur þetta ekki vel út og auðvitað fer þetta líka á sálina hjá mér,“ sagði Ólafur.

Ólafur Jóhannesson hefur mátt þola harða gagnrýni í nokkurn tíma enda hefur gengi liðsins verið afar slakt. Ólafur gat þó oftast í það minnsta borið fyrir sig að liðið hafi verið að spila þokkalega en svo var nú ekki í gær. „Ég spilaði bara með einn varnarsinnaðan miðjumann og það eru því ákveðin vonbrigði að við skyldum ekki skapa okkur fleiri færi,“ sagði Ólafur.

Íslenska liðið átti nokkra ágæta spilakafla í fyrri hálfleiknum með þá Eið Smára Guðjohnsen og Birki Bjarnason í fararbroddi en liðinu gekk illa að skapa sér færi með Heiðar Helguson algjörlega týndan í fremstu víglínu. Heiðar gerði að auki slæm mistök þegar Ungverjarnir komust yfir á 32. mínútu.

Heiðar átti þá slæma sendingu sem reyndist vera fyrirtaksstoðsending á Vladimir Koman sem lék upp að teignum og skoraði með góðu skoti fyrir utan teig.

Ungverjar bættu síðan við öðru marki á lokamínútu fyrri hálfleiksins þegar Gergely Rudolf slapp í gegn eftir skyndisókn, sólaði Stefán Loga Magnússon og skoraði af öryggi.

Íslenska liðið byrjaði seinni hálfleikinn af smá krafti en önnur varnarmistök gáfu Ungverjum þriðja markið og eftir það var íslenska liðið sem lamað inn á vellinum á meðan heimamenn léku sér og gátu bætt við nokkrum mörkum. Það var þó bara eitt mark sem bættist við og er hægt að þakka markverðinum Stefáni Loga Magnússyni fyrir það.

Það munar 74 sætum á Ungverjum og Íslendingum á Styrkleikalista FIFA og það má lesa milli línanna hjá forráðamönnum KSÍ að staða íslenska landsliðsins á listanum gefi nú ekki rétta mynd af styrk íslenska fótboltans. Í gærkvöld var gullið tækifæri til að opinbera vankanta heimslistans en þegar upp var staðið gengu íslensku landsliðsmennirnir niðurlútir af velli vitandi það að það er ekki tilviljun að íslenska landsliðið er í 121. sætinu.

Það er löngu orðið ljóst að Ólafur Jóhannesson er að stýra sínum síðustu landsleikjum en í gærkvöld læddist einnig að manni sá grunur að nokkrir leikmenn liðsins væri einnig komnir á endastöð. Heiðar Helguson og Indriði Sigurðsson hreyfðust varla á vellinum og fyrirliðinn Hermann Hreiðarsson var örugglega manna fegnastur þegar hann var tekinn út af í seinni hálfleik.