Skrifaði ummæli á dv.is um Aratúnsmálið - þarf að borga 500 þúsund

Héraðsdómur Reykjavíkur dæmdi í dag konu um sextugt til þess að greiða 500 þúsund krónur vegna athugasemdar sem hún skrifaði í athugasemdarkerfi á vefnum dv.is.

Konan skrifaði ummælin vegna fréttar blaðsins um nágrannaerjur í Aratúni í Garðabæ síðasta sumar sem töluvert var fjallað um í fjölmiðlum. Konan þarf að greiða hjónunum í Aratúni og syni þeirra þrjú hundruð þúsund og svo 200 þúsund í málskostnað fyrir þau.

Ummæli sem hún lét falla á vefnum væru dæmd ómerkt og þá var DV ehf., sem einnig var stefnt, sýknað í málinu. Dómari vísaði frá þeim kröfum að konan yrði dæmd til refsingar.

Hjónin í Aratúni hafa höfðað fimm hliðstæð dómsmál vegna ummæla í athugasemdakerfi á dv.is.