Rakel Dögg samdi við Stjörnuna

Rakel Dögg Bragadóttir er aftur gengin til liðs við Stjörnuna en þetta kom fram í tilkynningu frá félaginu í dag.

Rakel Dögg sagði við Vísi að þetta hafi verið erfið ákvörðun en hún var einnig í samningaviðræðum við Val.

Hún ákvað þó á endanum að fara til síns gamla félags á ný en síðast var hún á mála hjá Levanger í Noregi. Hún sleit hins vegar krossband í hné skömmu áður en deildin fór í frí áður en HM kvenna hófst í Brasilíu í desember.

Rakel býst við því að byrja að spila á ný í september eða október og ekki ólíklegt að hún muni missa af fyrstu leikjum Stjörnunnar á nýju tímabili.

Hún skrifaði undir tveggja ára samning en er heimilt að halda utan í atvinnumennsku á ný þarnæsta sumar ef það stendur henni til boða.