Alonso vann ótrúlegan kappakstur á heimavelli

Fernando Alonso á Ferrari vann ótrúlega viðburðarríkan kappakstur í Valencia á Spáni í dag. Alonso komst í forystu í kappakstrinum eftir að Sebastian Vettel þurfti að hætta vegna vélabilunnar. Alonso grét á verðlaunapallinum þegar þúsundir Spánverja fögnuðu honum.

Eftir að Vettel féll úr leik opnaðist kappaksturinn og á tímabili áttu Lewis Hamilton og Kimi Raikkönen möguleika á sigrinum. Þeir börðust hart um annað sætið sem Raikkönen tók þegar afturdekkin hjá Hamilton misstu allt grip.

Hamilton féll þá enn aftar og Pastor Maldonado reyndi að komst fram úr honum. Það endaði þó aðeins með því að Maldonado endaði utan brautar og ók svo inn í hliðina á McLaren-bíl Hamilton. McLaren-bíllinn endaði í vegriðinu og Lewis var brjálaður, eðlilega. Maldonado lauk kappakstrinum í tíunda sæti en á mögulega yfir höfði sér einhverja refsingu.

Michael Schumacher varð þriðji í kappakstrinum fyrir Mercedes. Það er fyrsti verðlaunapallur hans síðan hann snéri aftur í Formúlu 1. Síðast stóð hann á pallinum í Kína árið 2006. Hann ætlaði ekki að trúa því þegar hann ók yfir endamarkið. "Ég heyrði í talstöðinni: "Þetta er þriðja sæti", og mín fyrstu viðbrögð voru "Ha?"" sagði Schumacher á blaðamannafundi eftir mótið.

Mark Webber varð fjórði, Nico Hulkenberg fimmti og Nico Rosberg sjötti. Jenson Button á McLaren varð aðeins áttundi og átti mjög erfitt uppdráttar og aldrei séns á að hafa áhrif á toppbaráttuna. Á undan honum var Paul di Resta á Force India.

Á meðan Alonso ók frábæran kappakstur gerði liðsfélagi hans ömurlegt mót og endaði sextándi og hring á eftir. Felipe Massa var aðeins á undan HRT-bílunum.

Alonso hefur áður unnið kappakstur í ár sem þýðir að fjöldi sigurvegara í ár vex ekki. Þeir eru þó enn sjö í átta mótum sem er algerlega ótrúlegt. Alonso er efstur í stigamóti ökuþóra eftir sigurinn. Mark Webber er annar og Lewis Hamilton þriðji. Hamilton kom til Spánar efstur í stigamótinu.