190 metra upphafshögg beint ofan í

Gunnar Páll Þórisson úr GKG fór holu í höggi á 6. holunni á lokahringnum á Símamótinu í golfi en leikið er í Grafarholti í dag. Greint er frá þessu á vefsíðunni Kylfingur.is.

„Þetta var ótrúlega gaman. Ég sló með fjögur járni, þráðbeinu höggi á holu. Mér brá svolítið þegar ég sá boltann fara niður. Það var vel fagnað í hollinu," sagði Gunnar Páll í samtali við Kylfing.is.

Gunnar Páll hefur áður farið holu í höggi á þessari sömu holu en engin vitni urðu að því.

„Það var án vitna þannig að það telur ekki - ég náði þessu hins vegar núna. Ég fór svo fyrir tveimur árum holu í höggi á 9. braut í Leirdalnum," sagði Gunnar Páll.