Alonso: Fimm heimsmeistarakeppnir eftir

Fernando Alonso á Ferrari-bíl féll úr leik í fyrstu beygju í Japan í morgun. Hann telur hvert mót sem eftir vera einskonar heimsmeistarakeppni því nú hefur hann aðeins fjögurra stiga forystu.

Alonso lenti í samstuði við Kimi Raikkönen fyrir fystu beygju og snéri bíl sínum út af brautinni og inn á hana aftur. Við snúninginn drap Spánverjinn á vélinni og komst ekki lengra. Stigin 29 sem hann hafði á Sebastian Vettel eru í lok dagsins orðin fjögur.

Ferrari-ökuþórinn fullyrðir að ekkert hafi breyst hvað varðar nálgun hans á titilbaráttuna. Hann telur sig enn eiga góða möguleika. "Ég fell úr leik núna og kannski fellur Vettel úr leik næst, maður veit aldrei," sagði Alonso.

"Það eru fimm mót eftir sem verða öll eins og lítil útgáfa af heimsmeistarakeppninni því við þurfum að ná einu stigi meira en hinn."

Alonso kennir Raikkönen um örlög hans í kappakstrinum í dag. Framvængur Raikkönen snerti afturdekk Ferrari-bílsins. "Ég skil ekki af hverju Kimi hægði ekki á sér eða eitthvað því það var ekki mikið pláss fyrir mig," sagði Alonso.