Stuðningsmenn fögnuðu er Schaub meiddist

Raunir Matt Schaub, leikstjórnanda Houston Texans í NFL-deildinni, halda áfram. Það er búið að kveikja í treyjunni hans og reiður stuðningsmaður Texans kom heim til hans og hótaði honum öllu illu.

Í leik liðsins um síðustu helgi meiddist Schaub síðan. Stuðningsmenn Texans fögnuðu er hann haltraði af velli.

"Mér finnst skelfilegt til þess að hugsa að einhver fagni því að fólk meiðist. Sama hvort það er leikmaður okkar eða andstæðinganna," sagði Schaub en hann missti af fögnuðinum enda sárkvalinn.

"Svona á ekki að sjást á íþróttavöllum. Þetta er sorglegt."

Texans tapaði leiknum, 38-13. Óljóst er hvort Schaub geti spilað um næstu helgi.