Umfjöllun og viðtöl: ÍR - Valur 27-23 | Þriðja tap Valsmanna í röð staðreynd

ÍR vann sannfærandi 27-23 sigur á Val á heimavelli í Olís-deild karla í kvöld. Heimamenn leiddu frá fyrstu mínútu og náðu Valsmenn lítið að ógna forskoti þeirra. Sturla Ásgeirsson reyndist sínum gömlu félögum erfiður og skoraði 11 mörk í leiknum, þar af sex úr hraðaupphlaupum.

Valsmenn komu inn í leikinn eftir að hafa tapað tveimur leikjum í röð gegn Fram heima og FH í Kaplakrika. ÍR-ingar komu hinsvegar inn í leikinn með tvo sigurleiki á bakinu, gegn Akureyri heima og HK úti.

ÍR-ingar voru mun ákafari í fyrri hálfleik og höfðu undirtökin allan hálfleikinn. Heimamenn náðu mest átta marka forskoti í stöðunni 14-6 en þá vöknuðu gestirnir. Góður kafli sem þeir héldu markinu hreinu í átta mínútur en náðu aðeins að skora fjögur og voru hálfleikstölur 14-10 fyrir heimamenn.

Valsmenn skoruðu fyrstu tvö mörkin í seinni hálfleik og munurinn var skyndilega kominn í tvö mörk en það var vítamínssprautan sem heimamenn þurftu. Góður kafli kom muninum aftur upp í sex mörk og héldu þeir öruggu forskoti það sem eftir lifði leiks. Leiknum lauk með fjögurra marka sigri heimamanna, 27-23 sem fara með sigrinum á topp deildarinnar.

Valsmenn töpuðu þriðja leik sínum í röð og voru ósannfærandi í kvöld. Sóknarleikurinn gekk illa og upp úr því fengu ÍR-ingar alls 10 hraðaupphlaup sem þeir nýttu vel og var að lokum munurinn á liðunum í kvöld.



Bjarki: Frábær skemmtun í kvöld„Við byrjuðum að spila fast gegn þeim á upphafssekúndunum og við áttum svör við öllum þeirra aðgerðum í dag," sagði Bjarki Sigurðsson, þjálfari ÍR ánægður eftir leikinn.

„Hvort sem þú talar um vörn eða sókn, það rúllaði allt vel í kvöld. Við náðum góðu forskoti strax í upphafi og héldum sem betur fer dampi,"

Bjarki var ánægður með sína menn, þrátt fyrir að ná góðu forskoti í fyrri hálfleik héldu þeir áfram allan leikinn.

„Það er hætta á að menn detti niður á hælana og að halda einhverju forskoti. Við sýndum karakter í kvöld og ég er ánægður með strákana mína. Við höfum lent í því áður en í dag kláruðu menn verkefnið,"

Góður varnarleikur skilaði sér í mörgum hraðaupphlaupum fyrir heimamenn.

„Varnarlega gekk þetta vel, þeir voru að reyna atriði sem við bjuggumst við að þeir myndu reyna. Fyrir vikið komu lélegar sendingar og léleg skot og þá er eftirleikurinn auðveldur. Strákarnir frammi stóðu sig frábærlega í dag, þetta virkaði glæsilega,"

Eftir tap í fyrsta leik eru núna komnir þrír sigurleikir í röð hjá Breiðhyltingum.

„Þeir eru búnir að svara í dag, þessi leikur var prófsteinn fyrir liðið gegn liði sem er eitt af sterkari liðum deildarinnar,"

Góð stemming var í Austurberginu í kvöld.

„Þetta var frábær skemmtun fyrir handboltann, flottur leikur og fullt hús. Það var frábær stemming og ég vill hrósa stuðningsmönnunum fyrir að mæta á völlinn. Þetta hús er orðið að gryfju og það á að vera erfitt fyrir lið að koma hingað og ná í stig," sagði Bjarki.

Ólafur: Þurfum að halda áfram veginn„Þeir voru mjög þéttir í byrjun og okkur tókst illa að leysa úr því. Við vorum ekki nógu dýnamískir eða agaðir til að reyna á það," sagði Ólafur Stefánsson, þjálfari Vals eftir leikinn.

„Þeir fá mikið af auðveldum mörkum og í raun fátt gott sem við gerðum í fyrri hálfleik. Hraðaupphlaupin hjá þeim voru að drepa okkur."

„Þetta er tapaður leikur, málið dautt og við þurfum bara að fara yfir þetta. Það er æfing á morgun og við þurfum bara að fara áfram veginn. Menn eru ekki í takt ennþá og það er margt sem má laga,"

Ólafur hefur verið með áherslubreytingar í sóknarleiknum og menn eru enn að ná áttum.

„Við erum að skjóta full fljótt finnst mér. Ég er að reyna að kenna leikmönnunum að sjá möguleikana, ekki vera búnir að ákveða allt fyrirfram. Þetta tekur sinn tíma en þegar það kemur verður þetta mjög flott."

„Ég skrifa þetta tap á sóknarleikinn, við vorum að gefa of mikið af auðveldum mörkum. Við eigum líka markvörslu inni, um leið og þetta fer að tikka þá held ég að við verðum bara góðir," sagði Ólafur að lokum.





Sturla: Lítið púsluspil í pakkanum„Við byrjum gríðarlega sterkt, vörnin heldur og við fáum auðveld mörk úr hraðaupphlaupum. Upp úr því náum við góðu forskoti sem við lifum á út leikinn," sagði Sturla Ásgeirsson, leikmaður ÍR eftir leikinn.

„Þeir koma sterkir til baka og ná að minnka bilið í tvö mörk en við lifðum á forskotinu. Við spýttum í lófana við það og náðum að innbyrða gríðarlega sterkan sigur á vel mönnuðu liði,"

Fyrir utan stuttan kafla í seinni hálfleik var forysta ÍR-inga örugg allan leikinn.

„Forskotið var það mikið undir lokin að mér fannst sigurinn aldrei vera í bráðri hættu. Við vorum skynsamir og gerðum það sem var lagt upp með, bæði í vörn og sókn undir lokin og náðum að halda út,"

Sigur heimamanna grundvallaðist á liðsheildinni, þeir voru flottir á öllum sviðum í kvöld sem gaf af sér mörg hraðaupphlaup.

„Vörn, markvarsla, hraðaupphlaup og sóknin, allt flott í dag. Hraðaupphlaupsmörkin voru mikilvæg, það munar rosalega um að þurfa ekki að stilla upp í langar sóknir í hvert skipti. Ódýr mörk gefur liðinu séns á að hvíla sig í vörninni á meðan,"

Þetta var þriði sigurleikur ÍR-inga í röð eftir tap í fyrsta leik gegn ÍBV.

„Við erum búnir að vera að vinna í okkar málum allt frá þeim leik. Þróa okkar leik, bæði varnarlega og sóknarlega og það er vaxandi í okkar leik. Við þurfum að halda áfram, það er lítið liðið af mótinu. Það geta allir unnið alla en hér í Austurberginu ætlumst við til að vinna alla leiki. Þetta var eitt lítið púsluspil í öllum pakkanum," sagði Sturla að lokum.