Ingvar E. með stórt hlutverk í Everest

Leikarinn Ingvar E. Sigurðsson fer með stórt hlutverk í kvikmynd Baltasars Kormáks, Everest, sem tökur hefjast á í næstu viku.

Ingvar leikur rússneska fjallgöngumanninn Anatoli Boukreev, en myndin er byggð á bókinni Into Thin Air eftir rithöfundinn og fjallagarpinn Jon Krakauer. Segir hún frá hörmungaratburðum sem áttu sér stað á Everestfjalli árið 1996 þar sem átta fjallgöngumenn fórust.

Í samtali við Vísi segist Ingvar ekki hafa neina almennilega reynslu af fjallamennsku. „Ég er búinn að vera á fyrirlestrum og er síðan að fara í þjálfun,“ segir Ingvar, sem þó hefur gengið á fjöll. „Já já, bara á fótunum og með engar græjur. Ég er enginn alvöru fjallamaður þó mér finnist gaman að taka þessa litlu hóla hér heima.“

Tökur á myndinni hefjast í Nepal á mánudaginn en Ingvar tekur ekki þátt í þeim. Að loknum tökum í Nepal er förinni heitið til Ítalíu og þar hefst þátttaka Ingvars í verkefninu. Verður hann í góðum félagsskap þekktra leikara á borð við Jake Gyllenhaal, Josh Brolin, John Hawkes og Jason Clark.

„Ingvar lítur nánast út eins og hann,“ segir Baltasar leikstjóri í samtali við Vísi, og vísar þar til fjallagarpsins Boukreevs. Ingvar er ekki alveg sammála því en viðurkennir þó að líkindi séu til staðar. „Það er ýmislegt sem kallast á við okkur. Báðir ábúðarfullir menn.“

Hræðist ekki hólfin

Þá má geta þess til gamans að þetta er ekki í fyrsta sinn sem Ingvar leikur Rússa í bandarískri kvikmynd. Hann fór með hlutverk í kvikmyndinni K-19: The Widowmaker árið 2002 og lék þar rússneskan vélstjóra í kafbáti.

Ingvar er þó ekki hræddur við að festast í Rússahlutverkinu. „Nei nei, þegar maður er útlendingar og tekur þátt í verkefnum er auðvitað alltaf tilhneiging til þess að setja mann í einhver hólf,“ segir Ingvar.

Frumsýningardagur Everest hefur enn ekki verið ákveðinn en Baltasar vonast til þess að myndin verði frumsýnd öðru hvorum megin við næstu áramót. Hann flýgur til Nepals á morgun frá Lundúnum, en þar hefur hann unnið að undirbúningi myndarinnar undanfarið.

Auk takanna í Nepal og á Ítalíu verða atriði tekin upp í hinu víðfræga 007-stúdíói í Pinewood-kvikmyndaverinu í Englandi.