Tuttugu og fimm liggja í valnum í Kænugarði

Að minnsta kosti tuttugu og fimm hafa fallið í átökum mótmælenda og lögreglu í Kænugarði í Úkraínu frá því í gær. Óeirðalögreglan gerði í morgun atlögu að stærstu búðum mótmælenda á Sjálfstæðistorginu í miðbænum.

Flestir hinna látnu eru mótmælendur en níu lögreglumenn liggja einnig í valnum, auk eins blaðamanns, að því er fram kemur á vef BBC. Þá slösuðust hundruð í átökunum.

Mótmælin í landinu hafa staðið síðustu mánuði en átök blossuðu skyndilega upp í gær um leið og stjórnarandstöðuþingmenn reyndu að koma í gegn frumvarpi á þinginu sem hefði dregið mjög úr völdum forsetans Viktors Yanukovych.

Mótmælendurnir höfðu fengið frest til klukkan fjögur síðdegis í gær til þess að yfirgefa vígi sitt á Sjálfstæðistorgi en við því var ekki orðið.