Smá bata­merki hjá Schumacher

Formúlugoðsögnin Michael Schumacher er enn í dái eftir að hafa slasast á skíðum í lok síðasta árs. Hann hefur þó verið að sýna örlítil batamerki upp á síðkastið.

"Við erum enn bjartsýn á að Michael muni jafna sig og vakna," sagði fjölskylda hans í yfirlýsingu en þó svo hann hafi sýnt einhver merki þess að vera á réttri leið er hann ekki enn vaknaður.

Schumacher var settur í dá til þess að ná niður bólgum í kringum heilann en það hefur tekið langan tíma að vekja hann. Læknar segja það ekki vera óeðlilegt.

"Það var alltaf vitað að þetta yrði langur og erfiður slagur fyrir Michael. Nú þurfum við að vera þolinmóð," segir ennfremur í yfirlýsingunni.